De herderkes van Bethlehem, van ’t wonder euversteur
Die kwaame beej ’t stelke aan en boenzde op de deur
Sint Josef makde zutjes aop, zeej kneelde op de grond
Maria wonk eur doender beej, de vinger op de mond
Sttttt, stil ’t kiendje sluuep

In ’n erm land dao kriet ein kind, ’t kump maar neet in slaop
Zien mooder haet gen aete mier, gen toekoms en gen haop
God gaef det gans de wereld gauw de waeg nao ’t kiendje vindt
En de mooder strakkes dankbaar zaet vol leefde veur eur kind
Sttttt, stil ’t kiendje sluuep

De wereld van vandaag dae dreunt en davert van ’t geweld
En ’t schient wal haos of allewiels gen kinderlaeve telt
Gelökkig maar det minnig mins de haop nog altied haet
Det wiesheid oeist toch winne zal en gans de wereld zaet
Sttttt, stil ’t kiendje sluuep

De mins van de moderne tied dae gunt zich maar gen rös
Hae jakkert daag nao daag maar door op geld en good belös
T waas zoe good as hae weer ens de waeg nao ’t kiendje vond
En dao tot rös kwaam en fluustere kos, de vinger op de mond
Sttttt, stil ’t kiendje sluuep